Istorgia

Cevimil – We care since 1913

Avant passa 160 onns han las gruppas svizras da la CEVI cumenzà a s’engaschar per ils interess e basegns da las persunas che prestan servetsch militar.

Las ragischs van enavos sin in’ovra da giuvenils fundada il 1844 a Londra sin iniziativa da George Williams, in giuven assistent da commerzi. El e ses amis vulevan sustegnair giuvenils a moda cumplessiva, vul dir porscher agid per corp, olma e spiert. L’amur da Dieu manifestada en Jesus Cristus cumprendeva gea era tut ils secturs da la vita. L’idea da fundar talas «uniuns cristianas d’umens giuvens» ha chattà svelt blers aderents en Svizra. Tranter els per exempel il Genevrin Henry Dunant che ha fundà pli tard la Crusch Cotschna.

Las activitads dal CMS han cumenzà il 1856, cura che las gruppas da la Cevi han avert lur stanzas per las truppas militaras mobilisadas per proteger ils cunfins durant ils embrugls da Neuchâtel. L’onn 1860 èn las truppas svizras per exempel vegnidas transferidas a Genevra pervi da las tensiuns cun la Frantscha. Ils commembers dal battagliun 5 da Turitg han chattà portas avertas en ils locals da las uniuns genevrinas. En questa moda èn naschidas las emprimas localitads da leger e da scriver per ils schuldads. Durant prest tschuncanta onns èn las uniuns localas da la Cevi s’engaschadas per ils schuldads.

Il 1913 è vegnida fundada la cumissiun militara da la YMCA da la Svizra tudestga che ha inizià ina centralisaziun necessaria cun ina coordinaziun sin plaun naziunal.